बुलढाणा :
राष्ट्रीय राजकारणात मोठी जबाबदारी पार पाडलेल्या बुलडाणा जिल्ह्याचे सुपुत्र तसेच काँग्रेस पक्षाशी विद्यार्थी दशेपासून जुळलेले हर्षवर्धन सपकाळ यांची महाराष्ट्र प्रदेश काँग्रेसच्या अध्यक्षपदी निवड झाली. आज अखिल भारतीय काँग्रेस महासचिव के. सी. वेणूगोपाल यांच्या स्वाक्षरीनिशी हर्षवर्धन सपकाळ यांच्या नियुक्ती पत्र जाहीर झाले असुन या निवडीमुळे त्यांच्या समर्थकात जल्लोष करण्यात येत आहे.
बुलढाणा विधानसभा मतदार संघाचे माजी आमदार हर्षवर्धन सपकाळ यांची काँग्रेसच्या प्रदेशाध्यक्षपदी निवड झाली आहे. हर्षवर्धन सपकाळ हे राहुल गांधी यांचे निकटवर्तीय ओळखले जातात. काँग्रेस पक्षाने त्यांना जेव्हा-जेव्हा जी जबबादारी दिली. त्यांनी पक्षाचा एक कार्यकर्ता म्हणून जबबादारी पार पाडली. त्यांच्या या कार्यामुळेच पुढे त्यांना पंजाब, हिमाचल प्रदेश, मध्य प्रदेश व इतर राज्यांचे प्रभारी हे पदही त्यांनी यशस्वीरित्या पार पाडले. ते सध्या राजीव गांधी पंचायतराज संघटनेचे राष्ट्रीय अध्यक्ष, अखिल भारतीय काँग्रेस कमिटीचे राष्ट्रीय सचिव म्हणून कार्यरत आहे.
हर्षवर्धन सपकाळ यांची राजकीय कारकीर्द देऊळघाट जिल्हा परिषदचे दोन टर्म जिल्हा परिषद सदस्य, जिल्हा परिषद चे अध्यक्ष, २०१४ ला बुलढाणा विधानसभा मतदार संघाचे आमदार, तर २०१९ ला त्याचा बुलढाणा विधानसभा मतदारसंघात पराभव झाला होता. पुढे महाविकास आघाडीमुळे इच्छा असतानाही ते लोकसभा व विधानसभा निवडणूक लढू शकले नाही. पक्षाचा आदेश मानून त्यांनी माघार घेतली होती. त्यांना पक्षशिस्त कामाला आल्याची चर्चा राजकीय वर्तुळात बोलतांना दिसून येत आहे.
